jueves, 7 de enero de 2016

Discursu del Ismael en el omenagi a Gabriel y Galán



Discursu pal omenagi de Gabriel y Galán 
Ismael Carmona García 
Ya es un ritual estal an pie dela estauta del Gravielinu ca añu. Palos que vivimus i sentimus Estremaúra, reconocel las letras de Gabriel y Galán en Caçris tien una huerça especial, porque escrevil en estremeñu, essa lengua que son muchus los que la preibin i más los que la descaecin, es una manera de rebellal-si. El maestru que escrivi arrendandu lo que palra el puebru es vivil en el mesmu andal que él, porque no está la soberbia del señoritu que ai que derigil-si en castellanu ni el despreciu del que julga las lenguas pola fachenda delos palrantis. Por essu, quandu un maestru escrivi ena lengua que palra el puebru i sienti las cosas comu la sienti la genti llana, ai grandeza porque la genti se dita por él i piensa que assina no anda descaminá.

Agora los maestrus no escrivin comu la genti del puebru, ahuyin d’él i aprendin alos zagalis paque tengan que emigral. L’aprendin economía i alministración, l’aprendin ingrés, alemán, chinu, la geografía delas nacionis de mu largu i las honduras duna coltura que se fabrica en un despachu. Los maestrus d’agora no aprendin alos muchachus la coltura dela su tierra, porque la coltura daquí dizin que no sirvi pa ná. Enque uvieran maestrus que quieran enseñal la coltura daquí, ya los empataratarían dendi arriba pa acallal la su vos.

Los que estamus aquí ajuntaus algu quedremus Estremaúra, un quantu-quantu siquiera i reconoceremus velaquí que si estus zagalis no sabin ná dela nuestra tierra i delas nuestras costumbris i que si lo que estó a palral le sona a portugués es porque enas escuelas estremeñas no ai un rinconinu pa toas estas custionis. Que no aiga una assinatura palos críus sabel las cosas d’Estremaúra es condenal la sociedá estremeña al escachinamientu i la perdición, poscribí-la dela su propia tierra por passal la vida inoranti dela su estoria i dela su coltura. Muchus averán oi aquí que hadrá añus que no sientin el estremeñu comu lo sentía Gabriel y Galán quandu vivía i no porque aiga muau la lengua i esté más moderna, más bien porque la genti s’abexina i desaculandu-si d’ella prefieri siguil el campanillu que más retumbrea pa hazel la piara más grandi.

Estremaúra está falta de muchas cosas, peru la carestía más grandi que ai es la del conocimientu de nusotrus propius i dun reconocimientu posteriol pa assental bien las cosas. Precisamenti por essa desconocencia, no tenemus un día liquiamenti delas letras estremeñas reconocíu. Es que los nuestrus escrivientis en estremeñu o xalimegu o portugués no merecin tamién un vencijón? Tapocu tenemus una assinatura en Primaria ni en Segundaria que dé sostribu ala coltura tradicional estremeña. Es que la coltura anglosaxona es más importanti que la estremeña? Ni siquiera tenemus la reconocencia del estremeñu comu lengua por parti dela Alministración quandu associacionis i organismus entrenacionalis sí la reconocin. Es que no es tan lengua el estremeñu comu el el portugués, el gallegu o el castellanu? Pos velaí! Peru comu mos imponin un pensaeru por mé del que semus más ligerus p’aprendel lo dahuera que pa respetal lo propiu, ca añu que passa, la trasformación d’Estremaúra se da en prejuíziu delo que es la essencia dela propia Estremaúra. I pa querel más el mundu no ai que sel menus estremeñus, ai que querel-mus más comu estremeñus pa sel del mundu!

Dendi aquí, an pie dela estauta del Gravielinu, llamu los mis paisanus estremeñus paque sientan el hormiguillu que hormiguea i enverneçan los querelis por una tierra que, en dandu-mus de tó, tenemus el ansia de buscá-lu en otrus laus. Es tiempu de que el estremeñu desinquietu se sienti i recavi en que lo que nuestra tierra ofreci, no lo quitin otrus ombris. Assinque, por más que a muchus le duela, 
Viva Estremaúra! 
Caçris, 6 d’eneru del 2016

No hay comentarios:

Publicar un comentario